رمضان المنتشري . شاعر تستنطقه شاعرية فذة ، أغضبها
الصمت طويلاً ، فتمردت حتى بات لا يقوى على كبح
جماحها. فأفضى للمعري بضحكة الرضيع، وأسرّ للفرزدق
أن الشعر لا يقرضه سوى الأحرار، فيا لها من قلاع ،ويالها
من دروبٍ ما عُبدت.. إلا بأنفاس قوافيه.




أقرأ هذه الدرة التي توشحت بأجمل عبارات الابتهال وحسن
بيان الحاجة والتزامه بنسبة المعقول في رده الشكوى.





يا مالك الملك يا لله يا لشديـد القـوي
أنا بوجهـك مـن الدنيـا وصكاتهـا

لها سنه كاملة عيـت معـي تستـوي
من وين مـاروح مقفولـة ممراتهـا

البارحة نجم يتـوارى ونجـم يهـوي
طاحت من العين مدري من مجراتهـا

ما كل نجم ٍ يطيح اسمع لصوتـه دوي
الله جعلهـا تطيـح ويكتـم أصواتهـا

الجَم سكون التهاوي ليلي الفوضـوي
وتشابهت عندي أحيا الناس وأمواتهـا

يا لليل عكرت صفو الشاعر النخبوي
اللي سمان القصائد يصخـر أبياتهـا

والعارض اللي بغى يلوي ذراعي لوي
ما غير بيّن لـي أصحابـي ونياتهـا

وأنا صقر حر لا يطبـخ ولا ينشـوي
ليت العصافير مـا تكثـر حركاتهـا




جمال القصيدة اضطر الشاعر رشيد الزلامي للقصيدة لمجاراتها.
يقول الزلامي.





البارحة صار ليلي سرمدي وسـروي
وسائـل الصبـر قافلـةٍ محطاتـهـا

القلب مجروح والشكوى كوتني كـوي
الله يساعـد علـى الدنيـا وعثراتهـا

سمعت لي صوت ذيب ٍ فالحجاز يعوي
صوت الذيابـه يعبـر عـن معاناتهـا

جتني رسالة صديق ٍ رمزهـا معنـوي
من جور الايـام واضحـةٍ علاماتهـا

القلب قلب حضري والهرج هرج بدوي
حرك مشاعر قلوب ٍ طـول إسكاتهـا

أكيد يا ذيب في دربك تبا لـك خـوي
عايش ظروف الحيـاة وذاق لوعاتهـا

أخوك مشبعته الايـام طبـخ وشـوي
ما همتـه رحلـة ٍ طالـت مسافاتهـا




وهذه بعنوان ( هل يصلح العطار ما افسد الدهر)؟.
وهي تحاكي او تشرح حال جدة بعد الكارثة.




أثقل سنيـن العمـر عـام الثلاثيـن
سنه دفعنا شـرق جـدة لهـا مهـر

المهر يا سـادة ضعـوف ومساكيـن
آخر عهدهم عقب ما صلـوا الظهـر

يا رب يـا قابـل صـلاة المصليـن
تدخلهم الفردوس فـي حلـة الطهـر

غلطـه بسبتهـا فقـدنـا عزيـزيـن
ضحوا بهم في الثلث الأول من الشهر

نعـم ضحايـا العالـم المستبـديـن
وأعذارهم تفضحهم السـر والجهـر

مالت على الأمين وش عنـد الأميـن
يقـول عشوائـي هـذا والله القهـر

بدال مـا يجبـر مصـاب الحزينيـن
لا بالله ألا كلمتـه تكسـر الظـهـر

حنا علـى فرقـا بعضنـا مصابيـن
وهو عليه ألـذ مـن مويـة النهـر

تصرف له الدولـة ميـات الملاييـن
ويزرع لجده شوك ما يزرع الزهـر

اللي غريـب انـه مـداوم لهلحيـن
هل يصلح العطار ما أفسـد الدهـر




وهذه الدرة الساخرة ..بل هذه الدرة الساحرة التي جمعت
الشخوص والمدائن واستدعت من التاريخ رسائل تغلفها الحكمة




يا صاحبي فكه مـن أُم المعـارك
على نهاية لعبـة الكـرد والتـرك

صاحت حماس وقال حسني مبارك
ما عاد تستحمل خشوم العرب فرك

ياللي تهرول لاجل تظهر غبـارك
ترى العرب مافيهم اللـي يعبـرك

تصرفاتـك مـا تـرد اعتـبـارك
إن كان ما ماضيك يشفع لحاضرك

اسأل ضميرك وش مسبب حصارك
سبحان من فك اسر غير وحاصرك

اللي من أول تركنه فـي يسـارك
اليوم قدمك لايمينـك ولا أيسـرك

لكن تريـح فـي محطـة قطـارك
واستغفـر الله يمكـن الله يدبـرك

تدري متى تشعر بقـو انكسـارك
وتشعر بأن اللي يجبـرك يكسـرك


لا صار لك صاحب يحدد مسـارك
ويقلطك عنـد الـذي مـا يقـدرك




هنا واحدة من روائع النقد اللاذع حيث ، تجربة الشاعر العميقة والمامه
في معرفة ونقد بعض الفوارق الاجتماعية.




يا هاجسي لاهنـت وتعبـك مخلـوف
دامك بخيـر ودامنـي مابـي خـلاف

علمتك إني فيك لا اسمـع ولا أشـوف
وعلمتني هذا الزمـن مابـه إنصـاف

من فاقدين العرف مـا ريـد معـروف
اللـي شهايدهـم علاقـات وأسـلاف

اللي على المكشوف والعالـم تشـوف
يغيّبون أطـراف فـي سبـة أطـراف

الوضع مزري والعمل غيـر مألـوف
والسالفـة تنعاف..والشعـر ينـعـاف

لكن سيوف الغدر وان عـدة سيـوف
يبقى ثمنهـا بخـس وسنينهـا عجـاف

تمحل ،، ويتعدى بها الركب ويطـوف
ويرمي بها في الزاويـة كـل سيـاف

لو حاربوك أغراب ما صابك الخـوف
الخوف لاصا روا لهم ربعك أحـلاف


يا هاجسي سطر ذهب وانقش حـروف
وعلمهـم إن معزبـك سيّـد الـقـاف

اللي خلق شاعر وعمـلاق معـروف
ما يحتري الـإنصاف من عند الأنصاف





هنا بمناسبة قدوم ولي العهد سالماً معافا..




يا هاجسي وأنت لك بالشعر ساس وراس وجذور
أعرفك يا هاجسـي مـا ينقصـك عـزم وإرادة

إن كنت يا هاجسي حسب الطلب منهي ومامـور
أوقف على حيلك اترك عنـك تكبيـر الوسـادة

اليوم يومك وجا لازمك يعنـي منـت معـذور
أبغـاك تاقـف مـعّ شاعـرك ويحقـق مـراده

الفجر فجر السعد والليل كله نـور فـي نـور
نـورٍ يشتـت ظـلام الليـل ويبـدد ســواده

ما عقب ضيق الصدر إلا فرج وأفراح وسـرور
يالله عساهـا نهايـة حـزن وبـدايـة سـعـادة

ما جور يا سيدي سلطـان ممـا جـاك ماجـور
ماجـور ياللـي بوقفاتـه رفـع رايـة بــلاده

ما جور يا مزبن اللي جاك من دنيـاه معسـور
ضحى به الفقر وأنت أزهيت لـه شربـه وزاده

أرهت يمينك على المعسور حتى سـار ميسـور
وإعطيت وأعلنت ضد الفقر حرب يـلا هـوادة

وأسكنت شعبك بقلبـك قبـل لاتبنـي لهـم دور
أنا أشهد أنـك تحـب الشعـب ويحبـك زيـادة

والشيء بالشيء يذكر وأرفع الراية على الفـور
لـأمـر طـاري المحبـة والأخـوة والريـادة

يابو فهد قمـت عـن كـل السعودييـن بالـدور
دور المضحي بحالـه فـوق جهـده وإجتهـادة

أنته وقوفك بجنب أخوك عـن تسعيـن دكتـور
بكـامـل الأجـهـزة والصيدلـيـة والعـيـادة

يا من تميزت بسمو الوفـا يـا صامـل الشـور
الله وهبلـك علـى الطـالات ميـزه وإنفـراده

يا سور نجد العظيم إن كان في تعبيري قصـور
أعذر قصيدي وسامحنـي علـى كبـوة جـواده




ايضاً رائعة اخرى




صباحك عسل يا لصاحب المحتـرم بالـذات
صباح(ن)علـى قـدك يفصـل مقاسـاتـه

صباح الوفا اللي صارفـي عالـم الامـوات
بعـد وصلـت أعمـاق الشراييـن طعناتـه

على طاري أصحابي وقفت اكشف الصفحات
وكل(ن)وقفـت علـى حسناتـه وسيـاتـه

لقيت التشابه بيـن الاصحـاب والعمـلات
تشابـه يشـدك فـي جمـيـع اتجاهـاتـه

يقولـون يـا حـظ الـذي يـوزن الابيـات
وأقـول الحظيـظ إنسـان يـوزن علاقاتـه

على كثر هفوات أصدقاء كثر ..والهفـوات
سألت الضميـر إن كـان غيّـر قناعاتـه؟.

مدام الندم ما يجلـب الفايـت اللـي فـات
هنا يوقـف العاقـل علـى غيـر هقواتـه

صديقي تعلمت افعل اللـي افعلـه بسكـات
أنـا اللـي إذا قــرر ينـفـذ قـراراتـه

أنا لا وضعت الحي فـي عالـم الأمـوات
نجوم السما اقرب (له ولي) مـن علاقاتـه





ولـ فيصل الادب ، فيصل بن خالد نصيب من ابداع الشاعر.



يا شعري ظناك البحث عن حلمك المنشود
وأنا فيك أدوّر ما تبقـى مـن أحلامـي

غرفت البحر مدري نحتّ الجبال السـود
على شان أبرهن نزف حبري من أقلامي

يغيب الحضور الاصطناعي وأنا موجود
ولو كثـرت الأشبـاه خلفـى وقدامـي

يقولون لي ماجيت في يومـك الموعـود
على كبر سنـي ودهـم تصغـر أيامـي

واناجيت كلي شوق للموقـف المشهـود
محبه في اللي شوفتـه مصـدر إلهامـي

سلامي على فيصل ولد خالد بن سعـود
سليل الملوك اللي لهـم مجـد وإقدامـي

أمير بموروث الشعر له صلـه وعهـود
يجـدد مواثيقـه علـى مـر الاعوامـي

عطا الشعر والشعار دعمٍ بـدون حـدود
من المال والتوجيـه والجهـد الالزامـي

قبل يصبح الموروث له جمهره وحشـود
وقبـل الفضائيـات والغـزو الاعلامـي

أنا لو رضي عني سليل الكـرم والجـود
قل لاهل الحسد لانيب جايع ولا ضامـي

على حد علمي كل ذا نعمـة المحسـود
لكن الجبل مـا هزتـه رميـة الرامـي





ونختتم هذا المشوار مع المبدع رمضان المنتشري بقصيدة ( موكب الشعر).


يا موكب الشعر سير من بلد في بـلاد
لا تقبل الأسر في بقعه ولا فـي محـل

الأرض للي رفع عرشـه بليـا عمـاد
والشعر للمبدعين ولو حصل ما حصـل

البارحة زارني الطفل الذي في المهـاد
يصيح مظلوم ونمـوه بعـد مـا كتمـل

تخيلوا طفل يفقـد وحـده مـن الايـاد
ومن القهر صار عنده في الخلايا خلـل


أجبرني البس نهار العيد ثـوب الحـداد
اش لون أعيد وأنا راعي المصاب الجلل

والعالم اللي تذرفـي العيـون الرمـاد
أعمت عيون الطبيب اللي يداوي العلـل

أن كان ما عاد غـرد زايـر السندبـاد
رد التحية علـى شبـاك فجـر الأمـل