ألا يا الله طلبتك يا كريم=يلاه الكون علام الحوال
ولا تخفى عليك الخافيات=بيدك الأمر يا منشي الخيال
دبيب النمل ما يخفاك حسه=ويا محصي حصيات الرمال
خلقت الأرض بأيام قلائل=ومنزل على العرش آمتعال
أسألك رحمتك يوم القيامة=وتغفر ذنبنا يوم الهوال
وترشدنا على الدرب الجليل=ونتبع منهج أصحاب الجلال
على منهج سلفنا الأولين =ولا نمشي مع الدرب الخمال
ليامنا ذكرنا أجدادنا=هل التاريخ ماضين الفعال
تشرفنا بهم من دون شك=وتفخر لا حصل فيهم مجال
الكفو تاريخه يدوم=ولا تنسى تواريخ الرجال
تواريخ الجدود الراسيات=كما ترسى شواميخ الجبال
وحنا من بعدهم ثابتين=بأمر الله ولله الكمال
يفضل الله عوايدنا جزيله=ورثناها عن أجداد جزال
نقلد مشيت الأجداد حق=ونتبع نهج وافين الخصال
وأنا من بعد جربت الحيات=وذقت من المراره والزلال
أبقدم نصيحة مع وصية=مادام الوقت معطيني مجال
وأنا ما أقصد بها إلا وجه ربي=عساها تنفع أقلوب غفال
فلا تصغي الليالي لبن يأدم=حياته بين حل وارتحال
أوصيك بصلاتك والصيام=مادام الرزق من ربك تسال
ولا تلهيك دنياك الشقية=لابدك يوم من شد الرحال
وأباوصيك بر الوالدين=حقوق الوالدين من العيال
وحق الجار وصاية نبينا=وقول الصدق والرزق الحلال
ولا تمشي مع الرجل النموم=يدور سالفة قيل وقال
يودي عند هذولا وذولا=علوم ما يصورها الخيال
وجنب كل ما شفت اجتماع=ومنسوبيه ما قالوا تعال
وبنت اللاش لو يعجبك زوله=وشخص بالعمامه والعقال
لا هوب أيفيد فيداً من بعيد=ولا يشفيك في يوم القتال
ولا تمشي مع الرجل البخيل=هزيل موقفه جماع مال
وعز النفس عن درب المذله=ورزقك عند من يبدي الهلال
وخلك للعلا رجل طموح=وترقي فوق هامات العلال
حلات القرم لا زادة طموحه=ولو فكر بشي مستحال
تعرف بالدروب الكايدات=نزيدك من على الصبر احتمال
ليامن جات عسرات الدروب=يبين الكفو ما فيها جدال
والأ بالرخا كل يسد=ويفعل ما يريده باختيار
وليا ضدك من الدنيا ضدود=فلا تصفق بيمناك الشمال
تعنز بالرجال الطيبين=ولا تعنز على الجرف الهيال
ثقيل الحصل ما كل يشيله=ترى مال الحمول الا الجمال
تعرف بالرجال أهل العدالة=ليا جاء الحق تحكم بالعدال
ترى مشيك مع أرجالاً عوارف=يجنبك المواقيف الهزال
رجال الطيب خوتهم تجارة=ورفقتهم على ما قيل قال
سوالفهم على معنى رفيع=وتلقى الهيل في صفر الدلال
وتلقى الكبش في قدره يفوح=وتلقى العود لرزق له مدال
مجالسهم لها عزة وقيمة =ما هو مجلس رديين الحبال
ردات الحبال ما منهم مسره=وعيشتهم بحيله واحتيال
ترى ناس بحيلتها تعيش= تموتبها ولو طالت لجال
ولا تامن عدوك لو صفالك=ترى قلبه مثل سود الليال
ولا ترخص قريبك عند غلطة=وغلطات القرايب ما تشال
ودرب الشر لا تنوى مسيرة=ودرب الخير خله لك منال
وحط الله دايم نصب عينك=ولا تظلم ولا يطريك بال
وصلى الله على سيد الرسالة=نهاية ما نظمته والمقال