يالله إني طلبتك ياعليم السدود
ياكريم العطايا يالعظيم الجليل

دلني للحقيقه وأعم عين الحسود
كلمة الحق ماأبدي عليها بديل

مرحبا بالرساله مرحبا بالردود
مرحبا يازميل يفتخر بالزميل

صار هيضي وشعري والمشاعر ترود
يوم جتني الرساله والردود الجميل

الحكم والقصايد والمناهل عدود
ماوردها غشيم ولاعرفها هبيل

فادها مطلقٍ من راسمين الحدود
مكرمين الضيوف وممنين الدخيل

صلب عليان وقت الزلزله والرعود
تعطي الحق طلابه وتشفي الغليل

حاملين النيامس والكند والفرود
هيبة الدار لاقابل عميلٍ عميل

من تمنى لقاهم ماأهتنى بالرقود
أهل مجد(ن) وتاريخ(ن) وسيف(ن) وخيل

لابةٍ من لفاهم بشره بالسعود
عزوةٍ مايربون الدني والذليل

يدركون الصعاب ويعقلون الهدود
لو تطيح العوايد .. عندهم ماتميل

من عرب وأصلهم يعرب على وقت هود
ساس وأصل العروبه من زمان الخليل

من قراء صفحة التاريخ يلقى شهود
مامدحت الرجال ألا بحكم الدليل

غمرهم وارثٍ طيبه من أصل الجدود
في دروب الكرامه يعمل المستحيل

قدركم فوق راسي يالسباع الفهود
قدركم فوق .. وأعلى منزله من سهيل

يازميل على الشدات صلب الزنود
أشهد إنك مع الآجواد مالك مثيل

في رضاك أنظم الآبيات وابذل جهود
دلةٍ فوحها من زعفرانٍ وهيل

والتحيات نرسلها وباقة ورود
للوفي راعي الشيمه عدو البخيل

ريحها الطيب والعنبر ومسكٍ وعود
طعمها من عسل حالي وماء سلسبيل

من يشيل المهمه مارضي بالجحود
ماتضيع الجميله عند راعي الجميل

راعي الطيب مثلك كل يومٍ يجود
جمل الله حالك .. جعل عمرك طويل

ودي آحكم القيفان وأبني وأزود
والعوارف يكفيها الكلام القليل