يافأر يافأر ياانجس من خلق في الوجود=غدرتني ليش تغدر ياخبيث الطبــــــاع
خربت هيكل عباتي غدر وحنا رقــــــود=الله يعدم سنونك وأنت تغدي قطــــــاع
ياناس لما نشدته كان قاسي عنـــــود=يقول انا سيد الفئران وامري مطـــاع
عندي من القوم مليونين عسكر جنـــود=أسنانهم عامره والذيل طولــــه ذراع
لا تحتقرني وتحسبني كماكم شــــــرود=بانت فعالي بفروتكم تجدهـــــا مزاع
قلت اترك الكبر والزود انتبه يامرود=ما فاد أبو جهل زود النفس والكبر ضاع
قال أنت خلك بطل قدام ربعي صـــــمود=لو جوك يملون مابين السماء والبقــاع
حن معشر الفأر عن جوهر شرفنـــا نذود=ما نقبل العار لو تأكل لحمنا السبـاع
قلت له خلك حشيم وهرجـــــكم لا يـزود=أخاف من زود هرجك لا يجيني صـداع
مخطي ومجرم وأنا عندي عليكم شهود=هيا إلى الشرع يرضينــــــــا بليا نزاع
قال إن ربعي في الميدان شبــه الأسود=وسلاحنا أذيالنا وبها نهــــــــد القلاع
قلت له لا بد من دونك نعــــــــمر سدود=ونحط لك مصيدة تستلزمك بالكــــراع
لكن يااحمق تورع قبل تضرب بـــعود=والله يا صاحبي ما عندك إلا الطقــاع
بكره نجيب لك جيش يعبـرون الحدود=عشرين قطه لها شهرين عطشى جواع
اظلافها بارزه وأنيابها كالفهـــــــود=تصبح جنودك في البيدا ضحايا صراع
قال أشهد إنك حكيم يا عريب الـــجدود=وجيشكم كفو فيهم كل فارس شجاع
أرجوك خل القتال وخل قلبــــــك ودود=ولا تصدق كلاما بالروادي يـــــــــذاع
وأنا بقومي مسافر عنك لأرض الهنود=نبي انتسامح وتعطينا ســـــلام الوداع
ان كان ودك تسامحني ونفــسك تجود=وإلا نجيب لك فروه بعد عقد اجتمــاع
قلت انقلع ربنا لا سامحك ياجحـــــود=مشيت لك بالوفا وأغريتني بالخـداع
أرحل وخل الديار وحل بين القــــــرود=ومع الحبيني وأبو جعران نصب شراع
بعدك يجينا المطر والقاع ينبــــت ورود=ونشوف خيرات بأرض الله ونلقى متاع
يافأر ما نعشق إلا بارزات النــــــهود=وأعيش لا شفت قربي لا بسات القناع