قدام الاقوال بسم الله سمينا=ثم اذكر المصطفى مكتمل الاوصافي
لله سجدنا وكبرنا وصلينا=ماهو بيخفى على رب الملا خافي
نرجوك حنا عبادك وانت والينا=ان تكفينا شر مافي الغيب ياكافي
ياطير حلق بريشك والجناحينا=اخفق جناحك وخله يوجف اوجافي
يزوع من جرد قدام المواذينا=يادوب يادوب نجم الصبح ينشافي
منصاك وادي الحمى سقم المعادينا=واهبط بقصر بناه شيوخ واشرافي
قصر الكرم والشيم والعز والدينا=والنية الطيبة والخاطر الصافي
ابن سويعد يشرفنا اذا جينا=عثمان حصن منيع فوق مشرافي
عثمان شيخ يجملنا ويوفينا=وتاج ودرع ضمين ولبس ضافي
عثمان ابونا وحاكمنا وقاضينا=حكيم يحكم بحق وعدل وانصافي
نقناه ذخر وفخر في الشد واللينا=على مدار السنين اسمان واعجافي
متعود فيه حاضرنا وماضينا=شيمة وقيمة وزين اخلاق واسنافي
لكن قدله سنه مامر وادينا =مدري عسى شيخنا ماهو بمتجافي
يلا اختلفنا وخيل شيخنا فينا=عميت علينا الدلايل والتصرافي
وعميت ابصارنا من لطم ايادينا=وسرنا نعسف عوادينا تعسافي
عفنا بعضنا وشعبنا دعاوينا=ويحوف الاخيار من الاشرار حوافي
اخاف تلحق بقاصينا ودانينا=يلين يرجع شجيع القوم خوافي
مابه رفيق ولا شيخ فرع فينا=ما كن به في بني قابوس عرافي
والله يوم اسمع سواليف العرب فينا=اللني اقول بعض الشيء ينعافي
ياربعنا لو تقاطعنا تردينا=ونصير بين الرماة وبين الاهدافي
ياربعنا لو تزاعلنا تراضينا=وحطيتكم بين رمش العين وحفافي